من تفعيلة الرجز باللهجة السورية

عُمري إلَك


عمري إلَكْ
بَمْشي عمرْ
وبِرْجَع إلَكْ
وكلِّ الطُّرُقْ بمشي معكْ
خطوِةْ سَحابْ
خطوِة مَطَرْ
مَوجة أمَلْ بطلَعْ مَعَكْ
وَمْضة غَزَلْ
تِستاهِلَكْ
حلم انسَكَب
فكر انكتَبْ
وانفتحت بواب الحقيقة ، بنورِها
حبرَكْ كَتَبْ ..
وكلِّ النجوم بْتشْبَهَكْ
وبتأمّلَكْ
وكل اللي هَمّي إفْهَمَكْ ..

********
صَوتي إلَكْ
كَوني مَعَكْ
اعرِفِتْ طرقاتِ الأمانْ
لابْضَيِّعها وْ لابضَيِّعَكْ ..
علَّمتِني فَتِّحْ عيون اللَيلِْ
تاشوفِ القمَرْ
وَيْن القمَرْ ؟!
ضَوَّكْ غَمَرْ
وِزرعت فيّيِ الشّوق ِ
كل ماتلبَّكِتْ
إسألْ سؤالْ ..
وْدَوِّر على فكره غريبه أو على
لحظة خَيالْ
فيها الفِكِرْ
فيها الشّعِرْ
تِشْعِل حنيني للكَمالْ ! ...