انتو زورتوا الشهاده

أنا معرفش القصيده دى مكانها هنا صح ولا غلط
بس روحت لمنتدى النبطى مفهمتش الشعر الخليجى خااااااااااالص وبعدين مش فاهمه يعنى إيه نبطى ؟؟؟؟ يعنى عامى ؟؟
فنشرتها هنا
ربنا يستر بقى وأستاذ خشان ميرفدنيش من المنتدى قبل ما أتخرج بسبب كدا

وسبب آخر أنى حاولت أكتبها بالفصحى بس اللغه مطاوعتنيش طلعت عامى غصب عنى وأرجو من أساتذتى تشريحها ونقدها فهى خامس قصيده عاميه لى

ردا على الأحداث الداميه التى جرت أول أمس فى ماسبيرو بين الأقباط والجيش فى القاهره



إنتو زورتوا الشهاده !!!


لاقونى قاعده ع الرصيفْ
بزاحم الصيف والخريفْ
واغرق ف أيام الشتا
واحلام كتير متشتتهْ
مرميـَّه حواليــَّهْ
باستنى نسمه من الربيع
تحيينى مره بعد موت تلاتين سنه
ولقوا انوثتى اتـْبـَدلتْ
وبقيتْ خشب ودهنتنى بلون الرصيف
لاجل العساكر ميجوليش
ويقولوا من حق الرصيف
أدفع ضرايب
غير شبابى إللى اتفنى
وأنا باشتهى طعم الرغيف
سألونى ...
عارفه يابنتى أمك تبقى مين ؟؟؟
ولا أبوكى كان منين ؟؟؟
وقبل أمَّــا أرد
ورونى ف إديهم ورق
وقالولى دى شهادة الميلاد
وأبوكى كان إسمه خسيس ومالوش أمان
وأمك يابنتى إسمها غدر الزمان
وانتى طريــَّه ف لفتك
جـَتْ ع الرصيف هنا حطتك
صَرخت : لااااااااااااااااااااااااا ...........
انتو زورتوا الشهاده
أنا مش ضحية أم باعت بنتها
أنا أمى كانت يوم ضحية أهلها
أنا بنت مصر
أنا أمى مصر
أنا مصر لسه مشوفتهاش
حسيتها وأنا لسه جنين
لكن على وعد اللقا
ولسه برضو متعرفوش إن إللى ميت فيها عاش
أنا أمى مصر
أنا بنت مصر
حتى العيون تشبه عيونها
نفس رمشى رمشها
وابتسامتى والتفاتى
شكل خدى خدها
لون سمارى
طعم دمعى المالح إللى ف دمعها
زيحوا فتنتكم بعيد
ولـَّعوها بعيد عن الأم إللى صانت عهدها
وإللى رغم نزيف جراحها
تموِّتْ الخوف إللى خانق شعبها
بضمه واحده ف حضنها
أنا أمى أطهر م الطهاره
أمى أعدل مـَنْ حـَكـَمْ
أمى جنب النجمه جاره
أمى أمه بتتظلم
زيحوا فتنتكم بعيد
أمى كل ولادها واحد
الصغير والكبير
والبنات زى الرجال
المسيحى زى مسلم
الكبار زى العيال
أمى كل ولادها واحد
دم كل ولادها واحد
ما فى غالى ومافى هيــــِّن
كل شاكر زى جاحد
مصر دم ولادها واحد
زيحوا فتنتكـــم بعيد
أنا لسه برضو مشوفتهاش
لسه على وعد اللقا
ولسه برضوا بحبها
وهاموت بردد حبها
وعيسى ومحمد شهود
على فتنه قامت ضدها
أنا أخت كل المصريين
مسلم أخويا
مسيحى أخويا
من كل مله وكل دين
أنا بنت مصر
وانتو زورتوا الشهاده